சுருட்டபள்ளி சிவன்

உண்ட மயக்கம்

மாலவனின் பாற்கடலில் மிக்க வருமலைகள்

ஓலமிட்டால் கண்ணுறங்க ஒண்ணாதே-கோலமிக்க

தேவியவள் பூமடியில் தேவதேவன் கண்ணுறங்க

மேவிவரும் மௌன மயக்கு.

நால்வர் தமிழ்கொடுத்த ஞானக் கிறக்கமோ

மாங்கனி தந்த மயக்கமோ-ஆலத்தை

உண்ட மயக்கமோ உத்தமியாள் பேரழகைக்

கண்ட மயக்கமோ கூறு

நாயன்மார் வீடுகளை நாடி நடந்தவரின்

தூய உபசரிப்பில் தான்திளைத்தும்-நேயரை

ஆட்டிப் படைத்தும் அருள்கொடுத்தசோர்வினிலே

நீட்டிப் படுத்தாயோ நீ.

பெண்டு தனைக்கேட்டு பிள்ளைக் கறிகேட்டு

திண்ணனவன் கண்களையுந் தான்கேட்டு-மண்மிசையே

சுந்தரர்க்காய் வீதிகளில் சுற்றித் திரிந்துவிட்டு

நொந்துபடுத் தாயோ நவில்.

தாழ்சடைகள் அம்மை திருமடியி லேபுரள

ஆழ்துயிலில் உள்ளதோர் ஆபத்து-ஆழிசேர்

கங்கை மறைந்திருக்கக் கண்டால் விடுவாளோ

எங்குறங்கு வாய்நீ இனி